《負「驚」請「序」》
可能大家都有啲忟憎，我就好似啲港女每日po pre wedding嘅相，倒數自己結婚一樣，每日都提及自己本書，但本書又未有得喺書局賣，如無意外，easter 後有㗎喇，而家我po返封面畀大家望梅止渴。呢個復活節我都等到好心急，好似等耶穌復活咁心急，對我嚟講，出書日期令往後嘅復活節都蓋上嶄新嘅意義。
今次係想謝「序」......
今日想特別多謝三個人，排名不分先後，我想多謝Relgitsjg - 史兄， Mayi 同 謝曬皮 TSE SAI PEI the incapable。呢三個人無私奉獻，各為我本身書寫咗 一篇序，我覺得寫序同捐贈器官 一樣咁偉大，因為寫序嘅人係用佢哋嘅reputation同名聲去endorse我，一個人嘅reputation係幾咁重要，你係要對我好有信心，你先肯為我賭上佢哋嘅名聲。大家見到劉夢熊你就明，endorse 一個人可以好大鑊，所以真係好多謝呢三個人。
請「序」過程真係膽戰心驚，我鐘意人，但唔係好多人鐘意我，不停invite 再不停被人拒絕，令我明白100毛dickson 不停示愛，屢戰屢敗嘅心情。有啲朋友提議我係人都send invitation，搵多啲名人寫序，好似同事濫發喜帖咁，甚至有人叫我不如試下搵早期大熱嘅薯片叔叔， 佢哋話，薯片叔為咗建立公關形象，有機會會應承。但我覺得第一本書嚟得咁珍貴，我就只想搵我鍾意嘅人為本書留下烙印。(正如我至今都唔明白，點解會有啲人為咗份人情，請啲三唔識七篤眼篤鼻嘅人，去飲你結婚嗰餐。)
好彩最後三位朋友挨義氣，由於我係好老土嘅人，好想講返我同呢三位朋友相知相交嘅經過同感受......
史兄其實我早喺2013年就有睇佢嘅文，奇妙嘅係，三年之後，竟然可以簽到出版史兄本書嘅同一間出版社 創造館，為我出版第一本書。透過出版社認識咗史兄，正如我之前提及，見到史兄真人，真係顛覆咗我嘅想像，史兄原來咁高大，仲有一種飽歷風霜嘅感覺。其實史兄嘅真人係比佢嘅文字 斯文同溫柔好多，好多事情上佢都畀咗好多意見我， 喺香港地識到個gentleman仲願意二話不說冇半點猶豫幫我，係幾難能可貴呢？
Mayi 唔係第一次幫我，我第一次搵佢幫手，係讀書搵佢做一個research interview，每一次搵佢幫手，都感到非常唔好意思，作為一個有三個小朋友嘅媽媽，仲要兼顧寫作，而呢個媽媽都肯回答我呢個煩膠學生嘅問題。我想像到佢嘅生活每一日都忙到天昏地暗，但今次搵佢寫序嘅時，佢竟然反過嚟話，得到我邀請覺得非常榮幸，點解有人咁好人嘅？
最後要多謝謝曬皮，我同謝曬皮本身係唔認識嘅，我只係佢一個fan屎。我都係以一個膽博膽嘅心態，睇下謝曬皮會唔會答應我。我一直以為謝曬皮係一個有智慧嘅醜婦，但後來我見到佢咁似陳秀珠，佢真係違反商品說明條例，一個咁有智慧嘅人竟然係美女！識咗佢好短時間，佢就敞開心窗，同我傾訴少女心事，我哋兩個就好似 古時候用icq咁， 吹水吹到越吹越興奮，傾咗幾個鐘計。由陌生人 吹到傾聽心事，令我重拾icq感覺，真係好sweet。收到佢為我寫嘅序真係大嚇一驚，點解？你地easter 後要買我本書來睇啦！
有人話序根本係一本書嘅appetizer，唔係主菜，唔太重要。但我覺得，我本書每一部分，都係精彩㗎。 我本書嘅序，唔係唔飽肚嘅appetizer，係演唱會嘅特別嘉賓，個嘉賓係會成為整場演唱會一個incredible 嘅magic moment。希望你哋睇本書嘅時候，細心咁睇下每一個序。
其實，淨係買呢三個序，本書都值回票價啦。
http://www.gccd.com.hk/booklist_single.asp?bid=10179
Search